 |
أرسل هذة الصفحة الي صديق |
متطوعه في التأمين الصحي_بقلم: منار عقل
السلام عليكم و رحمة الله و بركاته
" نحن قوماً اذا ضحكوا قالوا خيراً اللهم اجعله خير "
صحيح الكلام ده ؟؟؟؟؟
في نسبة لا بأس بها بتؤكد صحة هذه المقوله
طب يا ترى بنعمل كده ليه ؟؟؟؟
خايفين من بكره مثلاً ؟؟؟؟؟ خايفين من الحسد ؟؟؟؟؟؟ و اللا مش مصدقين نفسنا
اياً كان السبب الحقيقه ده موضوع كبيييييير و المفروض مناقشته بإستفاضه فيما بعد
لكن يا ترى هذه المقوله تنطبق على حال المتضررين من التأمين الصحي في بلادنا ؟؟؟؟؟؟؟
و الله ده كان رأى احد الأطباء المعالجين هناك لمّا عرضت عليه
انى اتطوع لمساعدتهم بالجهد في يوم الأجازه اللى عندي ..
عرضت عليه كده ليه ؟؟؟؟!!!؟؟؟
عشان شفت هناك و انا بخلص اوراق شخصيه شفت ناس خنقها الروتين عمّالين يلففوهم رايح جاى من جهه لجهه و من دور لدور و يوم يجر اسبوع في اسبوعين في شهر ميضرش
و في الأصل المفروض ان دول مرضي منهم اللى مش عارف يقف على رجليه 5 دقائق على بعض و كمان المفروض يعني انهم بيلجأوا للتأمين لتوفير نفقات العلاج الخاص و الإستفاده من خدمة الدوله يعني حرام لمّا اللى بيوفروه يروح في المواصلات و تبقى هي هي لمجرد ان محدش فاضي يفهمهم بالراحه و يديهم الطلبات على بعضها
و طبعاً الأطباء و الموظفين هناك ربنا يكون في عونهم مخنوقين آخر حاجه
و مش طايقين الهواء يلمس طرف انوفهم
بيجاوبوا بعنف و استسخاف و احياناً بعصبيه و اساءه بالذات مع البسطاء اصحاب المهن البسيطه و القرويين
و للامانه ساعات كتير برده بيطولوا بالهم بس في الواقع همّ فاكرين كده
فاكرين يعني انهم بيطولوا بالهم بينما همّ ساعتها بيكونوا برده بيردوا بشكل غير لائق على ناس مينفعش نرد عليهم كده زي كبار السن و السيدات
بس همّ مش حاسين انهم بيعلموا كده ..همّ بيردوا كده اتوماتيك من غير ما يأخذوا بالهم من كتير ما بيقولوا الكلام ده كل يوم و لمدة سنيين كتير من عمرهم
المهم انى اكتشفت ان الطرفين دول محتاجين همزة وصل بينهم و بين بعض ..الهمزه دي عبارة عن شباب متطوعين ...يكونوا لمّاحين للفهم السريع لكل المعلومات المختصره و الناقصه احياناً التى يقولها الأطباء و الموظفين و بالهم طوييل عشان يفهموا المريض بالبطء اللى هو محتاجه ..و قبل هذا و ذاك تكون في قلوبهم رحمه
الرحمه هي الطاقه الحقيقيه اللى حتديهم فرصه للتواصل مع الطرفين بنجاح كامل 
و طبعاً انا لمّا عرضت على الدكتور انى اساعد و العب دور الحلقه المفقوده و همزة الوصل دي عشان اساعد الطرفين مكنتش واثقه انى يعني مستوفيه الشروط اللى حطيتها بس اضعف الإيمان قلت ححاول و ربنا يساعدنى
كمان كان نفسي يوافق عشان ننسق معاهم بشكل رسمي و اطلب من حضراتكم التطوع بالجهد لآداء هذه المهمه في اليوم الفاضي اللى تختاروه حضراتكم و نطله كانريهات بإسم الجمعيه للساده المتطوعين و نتفق على ايام نتناوب فيها تقديم الخدمه و يشوفنا المريض يبقى عارف ان الناس دي حتساعده في اى خدمه يطلبها منهم
بس للأسف الدكتور فاجئنى و قال لى ان اللى انا عايزه اعمله ده معمول فعلاً عندهم و بيتقدم من خلال 
مكتب الخدمه الإجتماعيه الموجود في كل دور
قلت له طيب كويس يا دكتور امّال الناس اللى عماله تشتكى و تتخانق دي و حاجاتها لا تقضي بسهوله بيعملوا كده ليه؟؟؟؟؟؟
فقال لى احنا شعب غاوي يشتكي عمّال على بطّال لو نبطل شكوي و نعمل بنصف الوقت اللى بنضيعه في الشكوي و نتعب نفسنا شويه في مساعدة نفسنا مكانش ده بقى حالنا
و الله كان كلام مهم اللى الدكتور قاله
خلانى قلت في بالى طب ليه مكونش اول حد يستفيد من نصيحة الدكتور و بدل ما اضيع وقت حضراتكم و وقتى في قراءة مقاله اشتكى فيها من سوء معاملة التأمين الصحي للمواطنين
طب ليه مستوضحش الأمر الأول بنفسي و اتأكد احنا شعب غاوي شكوي و بنتدلع و اللا الدكتور هو اللى مش واخد باله
عشان كده طلعت على مكتب الخدمه الإجتماعيه في كل الأدوار الكلام ده كان من 3 اسابيع فاتت و دخلتلهم و سألتهم بنفسي
و خلال هذه ال3 اسابيع الماضيه ترددت عليهم عدد مرات لا بأس بها
و كونت نتيجه لا تقبل الشك ان الطرفين ما زالوا بحاجه لحد يلعب دور الحلقه المفقوده بين الموظفين و الأطباء بما فيهم موظفي الخدمه الإجتماعيه و بين المواطن المريض
و بدلاً من ان استعرض السلبيات الكتييييييير الواقعيه و القصص التى رصدتها و اضيع وقتكم و وقتى في الشكوي
برده حعمل بنصيحة الدكتور و اكون عمليه و اطلب منكم التطوع برده في مستشفيات التأمين الصحى بشكل خاص و كل و اى مستشفى حكومي في بلدنا بشكل عام
حنتطوع إزاى ؟؟؟؟؟
حضرتك حتختار اى يوم فاضي عندك و تختار اقرب مستشفى لبيتك و اؤكد يا ريت التأمين الصحي عشان دي اكتر جهه بيخلصوا فيها اوراق و تروح هناك تقعد 10 دقائق بين المرضي
و قبل ما يخلصوا ال10 دقائق حتكون عينيك شافت اكتر من 10 حالات على الأقل كلهم محتاجين للمساعده من اى نوع
اللى متسند على عكاز و ماسك في ايده ورقه مطلوب تتختم من المبنى اللى جنبه و يطلع بيها الدور الأول ثم التاني و يرجع ينزل تاني و كل هذا شاق عليه لكن حضرتك ممكن تعمله
و اللى في ايده ورقه مش عارف يقرأ اللى فيها و مش فاهم يروح فين و يجي منين و محتاج اللى يسأل له و يفهمه بالراحه
و اللى متأخر سفرها على قطره للعين و مرهم ثمنهم لا يتعدي ال50 جنيه و مع ذلك مطلوب منها تروح و تيجي 3 اربع مرات كل مرة ب50 جنيه لوحدها عشان تخلص اوراق هي مش فاهمه تخلصها إزاى و محتاجه حد يفهم و يفهمها و يا ريت لو ياخدها و يساعدها انها تعملها او على الأقل تسمعها كلمه طيبه تجبر خاطرها بيها بدلاً من نهرها كما يحدث
اضعف الإيمان حتلاقي واحد كبير في السن رجليه مش شيلاه و كل اللى محتاجه هو دراعك عشان يتسند عليه
انا بعمل كده ..و مفكرتش في دعوة حضراتكم اللا بعد تجربة هذا بشكل شخصي مرات و مرات
طبعاً الطريقه اللى بقول لكم عليها دي تعتبر طريق رأس الرجاء الصالح
في طريقه اسرع بكتير محبش الحقيقه اتطرق اليها في الحوار لكن حبيت المح لمن سيقرأ مقالى انى مش عايشه في كوكب فراغي و انى عارفه برده ان في ناس بتخلص مصالحها المعطله بما يسمى الإكراميه و صباح الخير و كل سنه و انت طيب ...الخ
لكن في النهايه مش كل الناس تملك القيمه الماليه لإلقاء تحية الصباح و همّ دول اللى محتاجين مساعدتنا
و لا كل الناس طبعاً للامانه في الجهات المسؤله بتخنقنا بالروتين او لا تمد يد العون لنا طمعاً في تحية الصباح بس هي ساعات بتيجي كده ..للأسف الشديد
عشان كده الدعوة اللى بوجهها لحضراتكم دي مهمه قوى اننا نحاول ننفذها قدر استطاعتنا و لو مرة في الشهر عشان نساعد الجهات المعنيه استيفاء الأوراق الضروريه
بدون ايلام المواطن المريض بأى شكل من الأشكال
و مش محتاجه اذكر نفسي و اذكر حضراتكم بحديث الرسول صلى الله عليه و سلّم
" كان الله في عون العبد ما دام العبد في عون اخيه "
مش محتاجه اذكر نفسي و حضراتكم بإن كلمة السر في الموضوع ده كله الرحمه
اشكركم و اتمنى ان اكون بمقالتى تلك استطعت ان امد يدي قليلاً لكل من اتمنى من قلبى مساعدتهم
اختكم
منار ممدوح عقل
